अर्जेन्टिना विश्व कपका लागि छनोट हुदै गर्दा ब्राजिललाइ भने ४-१ ले हरायो

अर्जेन्टिना फिफा विश्वकप २०२६ को लागि छनोट भएको छ।

दक्षिण अमेरिकी छनोट अन्तर्गत उरुग्वे र बोलिभियाबीचको खेल गोलरहित बराबरीमा सकिएपछि ब्राजिलसँग खेल्नुअघि नै साविक विजेता अर्जेन्टिनाको विश्व कप यात्रा पक्का भएको हो ।

छनोट निश्चित भइसकेपछिको बुधवार बिहान भएको खेलमा अर्जेन्टिनाले ब्राजिललाई ४-१ ले हरायो ।

घरेलु मैदानमा अर्जेन्टिना एकतर्फी जित दिलाउन जुलियन अल्भारेज, एन्जो फर्नान्डेज, एलेक्स म्याक्स एलेस्टर र जिलियन सिमिवनले गोल गरे । ब्राजिलका लागि म्याथुस चुन्हाले सान्त्वना गोल फर्काए ।

चौथो मिनेटमा अल्भारेजको गोलमा अर्जेन्टिनाले अग्रता लियो । १२औं मिनेटमा नै फर्नान्डेजले गोल गर्दै अग्रता दोब्बर बनाए ।

२६औं मिनेटमा चुन्हाले गोल गर्दै ब्राजिललाई खेलमा फर्काउने कोशिस गरे । ३७ औं मिनेटमा एलेस्टरले तेस्रो गोल गरेपछि पहिलो हाफमा अर्जेन्टिना ३-१ को अग्रता बनायो ।

खेलको ७१औं मिनेटमा सिमिवनको गोलमा अर्जेन्टिनाले ४-१ को सहज जित दर्ता गर्यो । दक्षिण अमेरिकाबाट विश्व कपका लागि छनोट हुने अर्जेन्टिना पहिलो टोली बनेको छ ।

दक्षिण अमेरिकी छनोटका अन्य खेलमा भेनेजुएलाले पेरुलाई १-०ले हरायो । कोलम्बिया र पारग्वेले २-२ , चिली र इक्वेडर तथा बोलिभिया र उरुग्वेले गोलरहित बराबरी खेलेका छन्।

शीर्ष स्थानको अर्जेन्टिनाको १४ खेलमा ३१ अंक पुगेको छ । ब्राजिल १४ खेलमा २१ अंकका साथ चौथो स्थानमा छ ।

इक्वेडर २३ अंकसहित , समान २१ अंकका उरुग्वे तेस्रो , ब्राजिल चौथो, पाराग्वे पाँचौं, २० अंकसहित कोलम्बिया छैंटौं स्थानमा‌ छ।

१० टोलीको सहभागिता रहेको दक्षिण अमेरिकी छनोटबाट शीर्ष ६ राष्ट्र विश्व कपका लागि छनोट हुनेछ । सातौं टोलीले प्ले अफको मौका पाउनेछ।