प्रधानमन्त्री ओली सहित अन्य मन्त्रीहरुले सम्हाले जिम्मेवारी

काठमाडौं । नवनियुक्त प्रधानमन्त्री केपी शर्मा ओली सहित अन्य मन्त्रीहरुले आफ्नो जिम्मेवारी सम्हालेका छन् । सोमबार शीतल निवासमा आयोजित विशेष समारोहमा पद तथा गोपनीयताको शपथ लिएपछि प्रधानमन्त्री ओली शहीद स्मारक र पार्टी मुख्यालय च्यासल पुगेका थिए । ब्राम्हणहरूले स्वस्ती बाचनको मन्त्रोच्चारण साथै निमित्त मुख्यसचिव लीलादेवी गड्तौलाले टीका र माला लगाएर स्वागत गरिन् ।

कांग्रेसका ८८ सांसदको समर्थनमा शुक्रबार राति ओलीले संविधानको धारा ७६ (२) बमोजिम प्रधानमन्त्रीको दाबी पेश गरेका थिए । कांग्रेस एमाले गठबन्धनलाई जसपा, जनमत पार्टी, जसपा नेपाल, लोसपा, नागरिक उन्मुक्ति पार्टीको समेत साथ छ । प्रधानमन्त्रीको रूपमा सिंहदरबारमा योसहित ओलीको चौथो इन्ट्री हो । प्रधानमन्त्री ओली संगै नवनियुक्त अन्य मन्त्रीहरुले पनि पद तथा गोपनियताको सपथ लिएर आ आफ्नो मन्त्रालयको जिम्मेवारी सम्हालेका छन् ।