राष्ट्रपति पौडेल बेलायती राजाको राज्याभिषेक समारोहमा जाने

काठमाडौं । राष्ट्रपति रामचन्द्र पौडेल बेलायती राजा चार्ल्स तृतीयको राज्याभिषेकमा सहभागी हुने योजना बनिरहेको छ । बेलायती राजा चार्ल्सको आउँदो मे ६ मा राज्याभिषेक हुँदैछ।

राष्ट्रपति पौडेलले त्यसैको लागि बेलायत जाने योजना बनाउनु भएको हो । राज्याभिषेकमा सहभागी हुन बेलायत जाने कार्यक्रम तय भएको शीतल निवास स्रोतले जानकारी दिएको छ।

शीतल निवास स्रोतका अनुसार राष्ट्रपति पौडेल मे ४ वा ५ मध्ये कुन दिन बेलायततर्फ प्रस्थान गर्ने भन्ने टुंगो भने लागिसकेको छैन। बेलायती महारानी एलिजावेथ द्वितीयको गत सेप्टेम्बरमा निधन भएपछि चार्ल्स तृतीयले राजसिंहासन सम्हालेका छन्।

वकिङघम राजप्रासादले सार्वजनिक गरेको निमन्त्रणासम्बन्धी एक विवरणअनुसार राज्याभिषेक समारोहमा २ हजार पाहुनालाई आमन्त्रण गरिने छ।

महारानी एलिजावेथको राज्याभिषेक समारोहमा करिब ३ घण्टा चलेको थियो । त्यस समारोहमा १ सय २९ राष्ट्रका ८ हजार २ सय ५१ प्रतिनिधि सहभागी भएका थिए ।