डीएनए परीक्षण गर्ने सहमतिमा राजपुतले तोडिन् अनसन

काठमाडौं । १७ दिनदेखि अनसनरत निहारिका राजपुतले अनसन तोडेकी छन्। राजपुतले उठाउँदै आएको माग सम्बोधन गर्न प्रशासन तयार भएपछि आइतबार साँझ उनले अनसन तोडेकी हुन्।

कानुन न्याय तथा संसदीय मामिलामन्त्री गोबिन्द बन्दीको रोहबरमा काठमाडौंका प्रमुख जिल्ला अधिकारी गोबिन्द प्रसाद रिजाल र निहारिका राजपुतले ३ बुँदे सहमतिमा हस्ताक्षर गरेका हुन्।

निहारिकाले बलात्कारबाट जन्मिएको छोरा र बलात्कार आरोपी शिवराज श्रेष्ठको डीएनए परीक्षणको माग गर्दै आएकी थिइन्। उनको माग अनुसार उच्च अदालत जनकपुरमा विचाराधीन मुद्दाको डीएनए परीक्षण गर्न अदालत समक्ष जाहेरवालाको तर्फबाट सरकारी वकिलले माग गर्ने सहमति भएको छ।

डीएनए परीक्षणलाई विश्वसनीय बनाउन अदालत समक्ष आवश्यक प्रक्रिया अपनाउन माग गरिने भएको छ। यी माग पूरा भएसँगै निहारिकाले १७ दिनदेखि गरिरहेको अनशन आजैको मितिबाट तोड्ने सहमती पत्रमा उल्लेख छ।

जिल्ला अदालत धनुषाले बलात्कारको आरोपमा श्रेष्ठलाई सफाइ दिएपछि उच्च अदालत जनकपुरमा पुनरावेदन गरिएको छ। उच्च अदालतमा भदौ ८ गतेलाई पेशी तोकिएको छ।

निहारिकाले बलात्कारको आरोप लगाएका श्रेष्ठलाई पनि केही दिन पहिले प्रहरीले पक्राउ गरेको छ। हाल उनलाई अभद्र व्यवहारको आरोपमा जिल्ला प्रशासन कार्यालयबाट म्याद लिएर थुनामा राखिएको छ।