बाबुराम भट्टराई पार्टीबाट निस्कासित, राई बने अध्यक्ष

काठमाडौं। सत्तारुढ दल जनता समाजवादी पार्टी (जसपा) ले संघीय परिषद्का अध्यक्ष डा बाबुराम भट्टराईलाई पार्टीबाट निस्कासन गरेको छ ।

जसपाले अध्यक्ष भट्टराईसहित ९ जना नेतालाई बिहीबार पार्टीबाट निस्कासन गरेको हो । जसपाले भट्टराईलाई पार्टीबाट निस्कासन गरे लगत्तै अशोक राईलाई संघीय परिषद अध्यक्ष बनाएको छ ।

जसपाको वीरगन्जमा बसेको केन्द्रीय कमिटी बैठकले डा बाबुराम भट्टराईसँगै हिसिला यमी, महेन्द्र यादव, दुर्गा शोप, प्रशान्त सिंह र गंगा श्रेष्ठ, रमेश यादव, भक्तबहादुर साह र दानबहादुर चौधरीलाई पदमुक्त गरेको हो। कारबाहीमा परेका ८ जना कार्यकारिणी सदस्य हुन्। उनीहरूमाथि पार्टी विधानविपरीत काम गरेको आरोप छ।

भट्टराईमाथि अध्यक्षले प्रयोग गर्ने अधिकार प्रयोग गरी बैठक बोलाउने काम गरेको, नयाँ पार्टी खोल्ने निर्णय गरेको आरोप छ। भट्टराईले मंगलबार र बुधबार दुई दिन काठमाडौंमा छुट्टै भेला बोलाएका थिए।