लिभरपुलको सहज जित

शीर्ष स्थानको लिभरपुलले इङ्ग्लिस प्रिमियर लिग(इपिएल) मा सहज जित हात पारेको छ ।

बिहीवार भएको खेलमा लिभरपुलले न्युक्यासल युनाइटेडविरुद्ध २-० को सहज जित दर्ता गरेको हो । घरेलु मैदान एनफिल्डमा लिभरपुललाई जित दिलाउन डोमोनिक स्जोबोस्जलाइ र एलेक्सिस म्याक एलिस्टरले गोल गरे ।

खेलको ११औं मिनेटमा स्जोबोस्जलाइको गोलमार्फत लिभरपुलले सुरुवाती अग्रता लिएको थियो । ६३औं मिनेटमा एलिस्टरले टोलीको अग्रता दोब्बर बनाए ।

त्यसपछि दुवै टोलीबाट थप गोल निस्कन नसक्दा लिभरपुलले सहज जित दर्ता गर्यो । जितसँगै लिभरपुल २८ खेलमा ६७ अंकका साथ शीर्ष स्थानमा छ । पराजित न्युक्यासल २७ खेलबाट ४४ अंकका साथ छैटौं स्थानमा छ ।

लिगअन्तर्गत सम्पन्न अन्य खेलमा म्यानचेस्टर युनाइटेडले रेलिगेसन जोनमा रहेको इप्स्वीच टाउनलाई ३-२ र म्यानचेस्टर सिटीले टोटनहमलाई १-० ले पराजित गर्यो । यसैगरी आर्सनल नटिङ्घम फरेस्टसँग गोलरहित तथा ब्रेन्टफोर्ड एभरर्टनसँग १-१ को बराबरीमा रोकिए ।