बुटवल–पाल्पा सडकखण्ड आजदेखि रातिको समय बन्द हुने

बुटवल । सिद्धार्थ राजमार्ग अन्तर्गत बुटवल–पाल्पा सडकखण्ड आजदेखि रातिको समय बन्द हुने भएको छ ।

पाल्पाको तिनाउ गाउँपालिका–५, हिउँदे खोलामा झण्डै ५० मिटर सडक भाँसिएकाले सम्भावित क्षति हुन नदिन आजदेखिअनिश्चितकालसम्म रातिको समयमा सवारी साधन सञ्चालनमा रोक लगाइएको जिल्ला प्रशासन कार्यालय पाल्पाले जनाएको छ ।

पाल्पाका प्रमुख जिल्ला अधिकारी आनन्द काफ्लेले आज साँझ ७ देखि बिहान ६ बजेसम्म अर्को सूचना नभएसम्म सबैखाले सवारीसाधन आवतजावत बन्द गरिएको बताए ।

उनले उक्त समयमा एम्बुलेन्स लगायतका अत्यावश्यक सवारी साधन चलाउनुपरेमा पनि स्थानीय प्रशासनसँग अनुमति लिनुपर्ने बताए ।

विगत केही दिनदेखिको अविरल वर्षाका कारण हिउँदे खोला खण्डमा सडक भाँसिएकाले एकतर्फी रुपमा सवारी साधन सञ्चालनमारहेको छ ।