कर्णाली सरकारबाट बाहिरियो माओवादी केन्द्र

सुर्खेत । कर्णाली प्रदेश सरकारबाट बाहिरिने घोषणा गरेसँगै माओवादीका मन्त्रीहरुले मुख्यमन्त्री यामलाल कँडेलालाई राजीनामा पत्र बुझाएकाछन् । 

मन्त्रीहरूले सोमबार मुख्यमन्त्री तथा मन्त्रिपरिषद्को कार्यालयमा पुगेर मुख्यमन्त्री कँडेललाई राजीनामा पत्र बुझाएका हुन् । 

सोमबार पत्रकार सम्मेलन आयोजना गर्दै पदबाट राजीनामा दिएको घोषणा गरेका थिए । नेकपा एमालेले नेतृत्व गरेको कर्णाली प्रदेशसरकारमा माओवादीबाट मन्त्री रहेका महेन्द्र केसी, वीरबहादुर शाही, रणसिंह परियार र दुर्गबहादुर रावतले पदबाट राजीनामा दिएका हुन्।

केसी आर्थिक मामिला तथा योजना, शाही सामाजिक विकास, परियार जलस्रोत तथा उर्जा र रावत उद्योग, पर्यटन, वन तथावातावरणमन्त्री थिए ।

मन्त्री रावत, शाही र केसी गत वैशाख १८ गते मंगलबार मन्त्रीमा नियुक्त भएका थिए । यस्तै यसअघि नै बिनाविभागीय मन्त्री बनेकापरियारले जलस्रोत तथा ऊर्जा विकास मन्त्रालयको जिम्मा पाएका थिए । यो संगै अब कर्णालीमा कांग्रेस सत्तामा जानेछ ।