माओवादी सांसद छक्कबहादुर लामा एमालेमा प्रवेश

काठमाडौं । नेकपा माओवादी केन्द्रका सांसद सांसद छक्कबहादुर लामा नेकपा एमालेमा प्रवेश गरेका छन् । २०७४ को निर्वाचनमा हुम्लाबाट प्रतिनिधिसभामा निर्वाचित माओवादी अध्यक्ष पुष्पकमल दाहाल प्रचण्डलाई छक्याउँदै एमालेमा प्रवेश गरेका हुन् ।

लामालाई नेकपा एमालेका अध्यक्ष केपी शर्मा ओलीले सोमबार पार्टीमा भित्र्याएका छन् । अध्यक्ष ओलीले आफ्नो निवास बालकोटमा उपमहासचिव प्रदीप ज्ञवाली लगायतहरुको उपस्थितिमा लामालाई खादा तथा टीका लगाएर पार्टीमा स्वागत गरे ।

२०७४ सालको निर्वाचनमा माओवादीबाट टिकट नपाएपछि वाम गठबन्धनको बागी उठेर सांसद जितेका लामा चुनावपछि तत्कालीन नेकपा हुँदै माओवादीमा फर्किएका थिए । २०४८ सालमा तत्कालीन संयुक्त जनमोर्चाबाट निर्वाचित भएका लामा जिल्लाका प्रभावशाली र लोकप्रिय नेता मानिन्छन् ।

उनीसहितको टिमलाई एमालेले प्रवेश गराएर टिकट दिन लागेको छ । यसअघि नै जिल्लाका प्रभावशाली माओवादी नेता छिमी लामाको टिम एमालेमा प्रवेश गरिसकेको छ ।