माछा मार्न लाग्दा करेन्ट लागेर बाबु–छोराको मृत्यु, आमा घाइते

काठमाडौं । तनहुँको शुक्लागण्डकी नगरपालिकामा करेन्ट लागेर बाबु–छोराको मृत्यु भएको छ । करेन्ट लागेर आमा घाइते भएकी छन् । नगरपालिकाको वडा नम्बर २ कोत्रेस्थित गुहेखोलामा माछा मार्ने क्रममा करेन्ट लागेर बाबु–छोराको मृत्यु भएको हो । ,

करेन्ट लागेर पाल्पाको निस्दी गाउँपालिका–५ घर भई शुक्लागण्डकी नगरपालिका–२ कोत्रेमा बङ्गुर फार्ममा काम गर्दै आएका २२ वर्षीय चित्रबहादुर ब्याम्बो र उनको नौ महिनाको छोरा आदि ब्याम्बो मृत्यु भएको प्रहरीले जनाएो छ। प्रहरीका अनुसार करेन्ट लागेर १९ वर्षीया दिलमाया ब्याम्बो घाइते भएकी छन् ।

विद्युतीय तार प्रयोग गरी माछा मार्ने क्रममा बिहीबार उनीहरुलाई करेन्ट लागेको थियो । चित्रबहादुर र आदिको उपचारका क्रममा पोखरास्थित गण्डकी मेडिकल कलेजमा गएराति मृत्यु भएको प्रहरीले जनाएको छ । घाइते दिलमायाको त्यही अस्पतालमा उपचार भइरहेको छ ।