बूढीगंगाको मेयर र उपमेयरमा एमाले उम्मेदवार अगाडि

काठमाडौं । बाजुराको बूढीगंगा नगरपालिकाको मेयर र उपमेयरमा नेकपा एमालेका उम्मेदवार फराकिलो अन्तरसहित अगाडि छन् ।

बूढीगंगामा अहिलेसम्म ४ वटा वडाको मतगणना सकिएको छ । वडा नम्बर १,२, ९ र १० को गणना सकिएको हो । यी ४ वटै वडामा एमालेका उम्मेदवार विजयी भएको निर्वाचन अधिकृतको कार्यालयले जनाएको छ ।

४ वटा वडा गन्दा र मेयर र उपमेयर एमाले उम्मेदवारले अग्रता लिएका छन् । मेयरमा एमालेका रामबहादुर बानियाँले फराकिलो अन्तरले अग्रता लिएका छन्। बानियाँले मतगणनाको शुरुवातदेखि नेपाली कांग्रेसका उम्मेदवारलाई पछाडि पार्दै अग्रता लिएका हुन् । ३६४८ मत गणना सकिंदा बानियाँले २१९६ मत प्राप्त गरेका छन् । कांग्रेसका रंगबहादुर खातीले १२३९ मतसहित पछ्याएका छन् ।

उपमेयरमा पनि एमालेकै मायाकुमारी खड्का कुवँरले २१७२ मतका साथ अग्रता कायम राखेकी छन् । उनकी प्रतिद्वन्द्वी कांग्रेसकी रीता शाहीले १२६२ मतसहित पछ्याइरहेकी छन्

वडा नम्बर १ मा एमालेका रणबहादुर थापा ४ सय १६ मतसहित विजयी भएका छन्। उनका निकटतम् प्रतिस्पर्धी नेपाली कांग्रेसका लोगबहादुर थापाले ३ सय ५० मत पाएका छन् ।

वडा नम्बर ९ मा एमालेकै मीनबहादुर सिंह ४ सय ९२ मतसहित विजयी भएका छन्। उनका निकटतम प्रतिस्पर्धी नेकपा एकीकृत समाजवादीका भरतबहादुर थापा २ सय ९३ मत ल्याए ।

वडा नम्बर १० मा पनि एमालेकै दलबहादुर सावद ५ सय ४८ मतसहित विजयी भएका छन् । उनका निकटतम् प्रतिस्पर्धी कांग्रेसका मोहनबहादुर बुढाले ४ सय ९१ मत ल्याएका छन् ।

वडा नम्बर २ मा पनि एमाले उम्मेदवार विजयी भएका छन् । फराकिलो मतान्तरसहित एमाले उम्मेदवार पदम भण्डारी विजयी भएका हुन् । उनले ८३८ मत ल्याउँदा प्रतिस्पर्धी नेकपा एकीकृत समाजवादीका उम्मेदवार दलबहादुर थापाले २३५ मत मात्रै प्राप्त गरे