मैले कसैलाई प्रधानमन्त्री बनाउँछु भनेको छैन : ओली

काठमाडौं । पूर्व प्रधानमन्त्री तथा नेकपा एमालेका अध्यक्ष केपी शर्मा ओलीले नेपाली जनताले आगामी प्रदेश र संसदीय निर्वाचनमा पार्टीलाई अधिक स्थानमा विजयी गराउने दाबी गर्नुभएको छ ।

अध्यक्ष ओलीले शुक्रबार विराटनगर विमानस्थलमा सञ्चारकर्मीहरूसँग अन्तरक्रिया गर्दै एमालेले संघीयता र लोकतन्त्रको रक्षा गर्न प्रतिवद्ध रहनाका साथै संविधान निर्माणमा महत्वपूर्ण भूमिका निभाएका कारण जनताले संसदीय निर्वाचनमा पहिलो पार्टी बनाउने धारणा व्यक्त गर्नुभएको हो ।

पूर्व प्रधानमन्त्री ओलीले आगामी संसदीय निर्वाचनमा अन्य कुनै वामपन्थी पार्टीसँग गठबन्धन नहुने समेत बताउनुभयो ।

ओलीले मुलुकमा एमालेमात्र वामपन्थी पार्टी रहेको दाबी गर्दै अन्य पार्टीहरू वामपन्थी नभएको आरोप समेत लगाउनु भयो । ओलीले नेकपा एकीकृत समाजवादीका कार्यकर्तालाई एमालेमा आए समाहित गरिने बताउनु भयो ।

उहाँले आफूले अन्य पार्टीका नेतालाई प्रधानमन्त्री बनाउने सम्बन्धमा कुनै आश्वासन नदिएको समेत उल्लेख गर्नुभयो । ‘मैले कसैलाई प्रधानमन्त्री बनाउँछु भनेको छैन’, उहाँले भन्नुभयो ।

ओलीले स्थानीय पालिकाको निर्वाचनले सबै निर्वाचनको स्थिति तय नगर्ने भन्दै सिट सङ्ख्याका हिसाबले केही कम आएर दोस्रो भए पनि लोकप्रिय मतका हिसाबले पार्टी पहिलो भएको जिकिर गर्नुभयो ।