काठमाडौंको फोहोर आजदेखि उठ्ने

काठमाडौं । काठमाडौं उपत्यकामा केही सातादेखि थुप्रिएको फोहार आजदेखि उठ्ने भएको छ । काठमाडौं महानगरपालिका र सिसडोल बञ्चरेडाँडा–कुँडुले ल्याण्डफिल साइट क्षेत्रका बासिन्दाबीच बिहीबार राति भएको सहमतिपछि फोहोर उठ्ने वातावरण बनेको हो । महानगरपालिका र ल्याण्डफिल साइट क्षेत्रका बासिन्दाबीच १९ बुँदे सहमति भएको छ ।

फोहार सम्बन्धी समस्या समाधानको उपाय खोज्न महानगरपालिका र ल्याण्डफिल साइट क्षेत्रका बासिन्दाबीच बिहीबार राति बैठक भएको थियो । बैठकमा लामो छलफलपछि राति १ बजे सहमति जुटेको हो । महानगर र ल्याण्डफिल साइट क्षेत्रका बासिन्दाबीच फोहोर ढुवानी रातिमा मात्र गर्ने सहमति भएको छ । त्यसको लागि सडक र ल्याण्डफिल साइटमा आवश्यक बत्ती महानगरपालिकाले जडान गर्ने सहमतिमा भएको छ ।

सिसडोल तथा बन्चरे डाँडामा फोहोरको दुर्गन्ध नआउने गरी काठमाडौं महानगरपालिकाले एक महिनाभित्र व्यवस्थापन गर्ने, फोहोरबाट निस्कने लिच्चड खोलामा नमिसाउने गरी २ महिनाभित्र वैज्ञानिक व्यवस्थापन गर्ने, फोहोर बोक्ने गाडीबाट बाटोमा लिच्चड नचुहिने व्यवस्था एक महिनाभित्र मिलाउने लगायत बुँदा सहमतिमा उल्लेख छ ।