चेल्सीलाई हराउँदै आर्सनलले उचाल्यो १४औ पटक एफए कप उपाधी

स्ट्राइकर पिएरे एमरिक आउबामेयाङको दुई गोलको मद्दतले एक गोलले पछि परेको स्थिति उल्टाएर चेल्सीलाई हराउँदै आर्सनलले एफए कपको उपाधि जित्न सफल भएको छ । २–१ गोलको अन्तरले जीत हासिल गर्दै आर्सनलले कीर्तिमानी १४ औँ पटक उपाधि हात पारेको हो ।

क्रिस्टियन पुलिसिचको गोलको मद्दतले चेल्सीले खेलको शुरुवातमा नै अग्रता लिएको थियो । तर, खेलको २८ औँ मिनेटमा आउबामेयाङले पेनाल्टीमार्फत खेल बरबारी गरे ।

दोस्रो हाफको ६७ औँ मिनेटमा आउबामेयाङले अर्को गोल थप्दै आर्सनलको जीत सुनिश्चित गरे । सेजार एज्पीलिकुएटा र पुलिसिचलाई घाइते हुँदै गुमाएको चेल्सीले खेलको ७३ औँ मिनेटमा माटेओ कोभाचिचलाई पनि दोस्रो पहेँलो कार्ड खाएपछि गुमाउनु परेको थियो ।

जीतसँगै आर्सनलले अर्को सिजन युरोपा लिगमा आफ्नो स्थान सुनिश्चित गर्न सफल भएको छ । यता, आर्सनलका प्रशिक्षक मिकेल आर्टेटा खेलाडी र प्रशिक्षकका रुपमा आर्सनललाई एफए कपको उपाधि जित्ने पहिलो व्यक्ति बनेका छन् ।

उता, चेल्सीले एफए कपका पछिल्ला १० फाइनलमध्ये तीनमा हार बेहोरेको छ । ती सबै खेलमा चेल्सी आर्सनलसँगै पराजित भएको हो ।