काठमाडौंको कमलादीबाट १५ किलो ‘सुन’ बरामद

काठमाडौंको कमलादीबाट अवैध रुपमा भित्र्याइएको १५ किलो ‘सुन’ बरामद भएको छ ।

महानगरीय प्रहरी परिसर काठमाडौंको एक टोलीले उक्त सुन बरामद गरेको हो । प्रहरीका अनुसार  विशेष सूचनाको आधारमा  १५ किलो सुन काठमाडौंको कमलादीबाट बरामद गरिएको जनाइएको छ ।

विशेष सूचनाको आधारमा प्रहरीले सुन तस्करलाई फलो गर्दै जाँदा तस्करको समूह सुनको झोला फालेर भागेको प्रहरीले जनाएको छ । सो क्रममा प्रहरीले झोलामा २ थान हतियार समेत फेला पारेको छ । 

सुन बोक्ने गाडीको नम्बर पहिचान भएको तर मानिस पक्राउ पर्न नसकेको बताइएको छ । पहिचान भएको गाडी र मानिस खोज्न प्रहरी परिचालन गरिएको छ । आजको मूल्यअनुसार बरामद सुनको मूल्य १२ करोड ६३ लाख  बराबरको रहेको छ । 

सुन बरामदबारे आजै पत्रकार सम्मेलन गरेर जानकारी गराइने काठमाडौं परिसरले जनाएको छ ।