गोंगबुमा ८ वर्षीय प्रयास कुँवरको अपहरणपछि हत्या, झोला भित्र शव भेटियो

काठमाडौं । दुई दिनअघि काठमाडौंको गोंगबु बाट बेपत्ता भएका ८ वर्षीय बालकको अपहरणपछि हत्या भएको छ । बेपत्ता भएका बालक प्रयास कुँवरको शव म्हेपीमा भेटिएको महानगरीय अपराध अनुसन्धान महाशाखाका प्रमुख एसएसपी धिरजप्रताप सिंहले जानकारी दिए।

बुबा प्रवीणले सञ्चालन गरेको स्वस्तिका त्रिवेणी गेस्ट हाउसबाट बेपत्ता भएका उनको खोजीमा व्यापक प्रहरी परिचालित भएका थिए । तर, बिहीबार झोलामा पोको पारेको अवस्थामा उनको शव भेटिएको हो । प्रहरीले घटनामा संलग्न भएको आरोपमा एक जनलाई पक्राउ गरेको छ । पक्राउ पर्नेमा स्याङ्जाका महेन्द्र सार्की छन् ।

उनी होटल सञ्चालकका ड्राइभर हुन् । एक महिनाअघिबाट मात्रै उनी प्रवीणको होटलमा काम गर्न थालेका थिए ।बालकको अपहरणपछि उनले फिरौती वा अन्य कुनै माग राखेका थिएनन् । प्रहरी स्रोतका अनुसार मालिकले निकालिदिन्छु भनेर पटकपटक गाली र धम्की दिएपछि अपहरण गरेको सार्कीले प्रारम्भिक बयान दिएका छन् ।

यद्यपि, के कारण हो भन्ने विषय निक्र्यौल भइसकेको छैन ।थप अनुसन्धान जारी छ । प्रयास टाउन प्लानिङको वेलमेन्ट इन्टरनेश्नल स्कुलमा कक्षा १ मा अध्ययनरत् थिए ।