बुवाले गरे श्रीमती र छोराको हत्या

काठमाडौं । रुकुम पश्चिममा एक व्यक्तिले आफनै श्रीमती र छोराको हत्या गरेका छन । सँगै सुतेका श्रीमानले आफनै श्रीमती र छोरालाई भरुवा बन्दुक र खुकुरी प्रयोग गरी हत्या गरेका हुन ।त्रिवेणी गाउँपालिका वडा नं.१ बल्लेजुराका ४६ वर्षीय सत्यबहादुर बुढाले राति सुतेको समयमा बन्दुक र धारिलो खुकुरी प्रहार गरी श्रीमती र कान्छा छोराको हत्या गरेका छन् ।

बुढाले ४१ वर्षीया श्रीमती इन्द्रकलालाई भरुवा बन्दुक र ११ वर्षीय कान्छा छोरा प्रकाश लाई कुखुरी प्रहार गरी हत्या गरेका हुन् । जिल्ला प्रहरी कार्यालयका प्रमुख डीएसपी सुमित खड्काले श्रीमती र छोरालाई हत्या गर्ने बुढालाई प्रहरी नियन्त्रणमा लिएको बताए ।

उनका अनुसार अत्याधिक रक्सी सेवन गरेका बुढा आफैँले पनि आफ्नो घाँटि रेटेर आत्महत्या प्रयास गरेका थिए । बुढाले श्रीमतीको पेटमा गोली र छोराको घाँटिमा खुकुरी प्रहार गरेको उनले बताए । घरको अर्को कोठामा सुतेका जेठा छोरा डिल्ली बुढाले बिहान करिब ४ बजे मात्र घटना थाहा पाएका थिए ।

गोल्डेनखबर