- Loading...
निर्वाचन हुनेमा नेता नेपाल आशावादी
- गोल्डेन खबर
- ७ साल अघि
- ७४ पटक पढिएको
![Post Thumbnail](https://www.goldenkhabar.com/wp-content/themes/goji-2023/img/default.png)
काठमाडौँ, ६ वैशाख । नेकपा (एमाले)का वरिष्ठ नेता माधवकुमार नेपालले निर्धारित समयमा स्थानीय तहको निर्वाचन हुनेमा आफू बढी आशावादी भएको बताउनुभएको छ ।
प्रगतिशील तथा पेसागत कानुन व्यवसायी सङ्गठन (पिपिएलए) ले यहाँ आज आयोजना गरेको स्थानीय तहको संरचना र निर्वाचन सम्बन्धमा छलफल कार्यक्रममा उहाँले आज प्रधानमन्त्री पुष्पकमल दाहालसहित प्रमुख राजनीतिक दलको बैठकपछि आफू निर्वाचन हुनेमा आशावादी भएको बताउनुभएको हो ।
“बैठकमा प्रधानमन्त्रीले पटकपटक निर्वाचनका बारेमा कुनै आशङ्का नगर्न र निर्वाचन नभए मुलुक ठूलो दुर्घटनामा पर्छ”– भन्नुभयो । गृहमन्त्री विमलेन्द्र निधिले पनि निर्वाचनको सम्पूर्ण सुरक्षा व्यवस्था मिलाइसकेको बताउनुभयो । उहाँले भन्नुभयो, “त्यसैले उहाँहरुको भनाइबाट म निर्वाचन हुनेमा आशावादी देखिएको छु ।”
बैठकमा मधेसी मोर्चा निर्वाचनमा सहभागिता जनाउँछन् भने बजेटपछि पनि निर्वाचन गर्न सकिने कुरा चलेको बताउँदै उहाँले भन्नुभयो, “वैशाख ३१ गते नै निर्वाचन हुन्छ । प्रदेश १ र २ मा पछि गरौँला भन्ने कुरा बेग्लै हो ।”
उहाँले नेत्रविक्रम चन्द, सिके राउत, मधेसी मोर्चा, विभिन्न जनजाति र साना हतियारधारीबाट निर्वाचनमा धम्की आउनसक्ने भन्दै त्यस चुनौतीलाई सामना गर्न सुरक्षाकर्मी तयार रहेको धारणा राख्नुभयो ।
एमाले महासचिव ईश्वर पोखरेलले एमालेले जित्ने वा हार्ने भन्दा पनि संविधानको प्रभावकारी कार्यान्वयनका लागि निर्वाचन आवश्यक भएको बताउनुभयो । उहाँले अझै पनि निर्वाचनलाई सके सार्ने नसके टार्ने खेल भइरहेको भन्दै निर्वाचन नहुँदा देशमा कालो बादल मडारिने चेतावनी दिनुभयो ।
उहाँले संविधान जारी नगरौँ भन्ने पक्षले अहिले संशोधन गर्न खोजिएको उल्लेख गदै कुनै पनि हालतमा संविधान संशोधन नहुने दाबी गर्नुभयो । एमाले सचिव गोकर्ण विष्टले संविधानको कार्यान्वयनका लागि तीनै तहको निर्वाचन निर्धारित मितिमा गर्नुपर्ने बताउनुभयो ।
कार्यक्रममा एमाले पोलिटब्युरो सदस्य रधुजी पन्त, नेपाल बार एसोसिएसनका पूर्वअध्यक्ष शम्भु थापा, विश्वकान्त मैनालीले लोकतन्त्रको अभ्यासको आधारशीला स्थानीय तह भएकाले जनताको अधिकार स्थापित गराउनका लागि निर्वाचन गर्नुपर्ने बताउनुभयो ।